Leifur Örn Svavarsson


Leifur Örn Svavarsson var einn af stofnendum Íslenskra Fjallaleiðsögumanna 1994 og er enn í dag einn af aðaleigendum fyrirtækisins.
Hann hefur farið allar helstu ferðir ÍFLM sumar sem vetur, jafnt innanlands sem utan og er einn reyndasti fjallaleiðsögumaður landsins.

Í maí 2013 varð Leifur Örn fyrsti Íslendingurinn til að komast á topp hæsta fjalls jarðar, Everest, með því að fara upp norðanmegin.

Leifur hefur farsællega stýrt leiðöngrum Íslenskra Fjallaleiðsögumanna á hæstu fjöll margra heimsálfana eins og Elbrus – hæsta fjall Evrópu, Aconcagua- hæsta fjall Suður Ameríku, Denali/Mt. McKinley- hæsta fjall Norður-Ameríku og  Mt. Vinson- hæsta fjall Suðurheimskautslandsins.

Leifur hefur farið í fjölda einkaleiðangra í Alpana og á mörg hæstu fjöll jarðar.  Leifur hefur meðal annars klifið Pik Lenin (7.134 m) í erfiðum aðstæðum í vetrarbyrjun og skemmst er að minnast er hann náði toppi Cho Oyu, sjötta hæsta fjalli jarðar 8.202 m.
Leifur Örn Svarsson í Útiveru - Smellið til þess að lesa
Grænland og heimsskautasvæðin eru heimavöllur Leifs.  Hann hefur leitt tvo af leiðöngrum Íslenskra Fjallaleiðsögumanna yfir Grænlandsjökul, verið leiðangurstjóri í leiðöngrum ÍFLM á hæsta fjall Grænlands, Gunnbjörnsfjall, tind í afskekktum hluta austur Grænlands, ásamt Dome og Eijnar Mikkelsen.  Meðal leiðangra Leifs til Grænlands má nefna 29 daga þjálfunarferð með Indverska herinn á Grænlandsjökli til þess að þjálfa þá fyrir gönguskíðaferð á Suðurpólinn og 18 daga heimskautaþjálfun með sérsveit bandaríska hersins til Thule, nyrstu byggðar á Grænlandi.

Margir leiðangra Leifs eru einstakir eins og Nanoq leiðangurinn á Mt Forel árið 2000.  Þá fór hann ásamt Guðjóni Marteinssyni á hundasleðum upp á Grænlandsjökul, gekk síðan á skíðum norður jökulinn að Forel fjalli, kleif fjallið og gekk síðan 150 km leið um torsótt fjallasvæði til byggða á Austur Grænlandi.

Leifur er óþrjótandi fræðslubrunnur um Grænland, hefur heimsótt nánast hvert byggðarlag í landinu og farið fjölda göngu- og skíðaferða víðsvegar á Grænlandi.  Um tíma var Leifur með fasta þætti í ríkisútvarpinu um könnunarsögu Grænlands, leiðangra og heimskautaferðir.

Leifur er jarðfræðingur frá Háskóla Íslands með framhaldsmentun í snjóflóðum.  Leifur hefur lokið Level 2 snjóflóðamenntun kanadíska snjóflóðasambandsins og hefur síðastliðna vetur stýrt snjóflóðaeftirliti Veðurstofu Íslands sem vaktar snjóflóðahættu yfir byggð á Íslandi.

Leifur hefur mikla reynslu af fyrirlestrahaldi og kennslu.  Hann hefur haldið fjölda fyrirlestra og myndasýninga.  Leifur var yfirkennari Björgunarskóla Slysavarnarfélagsins Landsbjargar til margra ára.  Þar sá Leifur meðal annars um menntun leiðbeinenda í fjallamennsku, fjallabjörgun, snjóflóðum, gerði námskeiðslýingar og skrifaði kennslubækur sem enn eru í notkun.

Leifur var flokkstjóri undanfarahóps Flugbjörgunarsveitarinnar í Reykjavík í meira en áratug og stjórnaði aðgerðum björgunarsveitarmanna á vettvangi í mörgum stórum björgunaraðgerðum eins og snjóflóðunum á Flateyri og fjallabjörguninni úr Glymsgili ásamt fjölda annara aðgerða.

Leifur hefur stýrt fjallgöngu og jöklaleiðsagnarhluta Íslenskra Fjallaleiðsögumanna og séð um þjálfun jöklaleiðsögumanna sem yfirleiðsögumaður. Leifur hefur verið fararstjóri í fleiri ferðum á Hvannadalshnjúk heldur en tölu verður á komið, auk ferða á Hrútsfjallstinda, Þverártindsegg, Sveinstind og göngu og skíðaferða á aðra hæstu jökla og fjallstinda landsins.

Leifur er mjög virkur í fjallamennsku og hefur klifrað fjölda nýrra klifurleiða á Íslandi seinustu áratugi.  Þrátt fyrir að öðru hvergju megi ná Leifi á skrifstofu Íslenskra Fjallaleiðsögumanna unir hann sér best með ísexi í hönd eða skíði á fótunum.
Hér má nálgast viðtal við Leif í tímaritinu Útiveru frá 2006.

Yfirlit yfir helstu afrek Leifs
1980 Fyrstu gönguskíðin … styttri ferðir.
1981 Eignaðist klifurbúnað … Ísklifursnámskeið hjá Ísalp.
1982 Klettaklifursnámskeið ýmsir tindar; Tindfjallajökull, Hekla o.fl.
1983 Flugbjörgunarsveitin í Reykjavík.
1984 Keypti Willís-jeppa með Einari Torfa og þvældist um hálendið; Hrútsfjallstindar, Hlöðufell o.fl. Leiðbeinandanámskeið í skyndihjálp. Laugavegurinn á skíðum. Keppti í fjallamaraþoni Landsambands Hjálparsveitar Skáta.
1985 Fyrsta ferðin í Alpana og fjallamennskunámskeið hjá Kapruner Hochgebirgschule í Austurríki. Kleif Mont Blanc, norðurvegginn á La Tour Ronde o.fl. Kleif m.a. Þumal. Fyrsta ferðin sem fararstjóri
með franska ferðamenn. Fyrstu ferðirnar sem fararstjóri hjá Ferðafélaginu um páska og áramót.
1986 Ýmislegt brölt með Flugbjörgunarsveitinni og flokkstjórn.
1987 Mánaðarferð í Alpana með Einari Torfa og síðan Jóni Geirssyni. Klifu m.a. Frendo hrygginn á Midi með bívak í þrumuveðri og ítölsku Brenvaleiðina á Mt. Blanc, La Tour Ronde,
Gervasutti Coloir, hryggjaleiðina á Rochefort og reyndu við fleiri leiðir. Veturseta í Frakklandi með meiri ástundun klettaklifurs en frönskunáms!
1988 Leiðbeinandaréttindi í snjóflóðum, mikið ísklifur með ýmsum aðilum.
1989 -1990 Jarðfræðinám við HÍ. Allnokkrar nýjar ísklifur- og fjallamennskuleiðir, austurveggurinn á Antafellstindi bar hæst.
1991-1999 Stundaði blandaða fjallamennsku og ferðalög. Leiðsögumaður
yfir Sprengisand, bæði sumar og vetur, einnig nokkrar ferðir yfir
Vatnajökul og fleira krefjandi. Með Guðjóni Marteinssyni sigraði
hann í tveimur fjallamaraþonum Landsbjargar og saman fóru þeir
eina vetrarferð í Alpana.
1999 Leiðangur til Austur Grænlands þar sem farið var á Gunnbjörnsfjall og Dome með Guðjóni Marteinssyni.
2000 Leiðangur á Mont Forel, leiðsögn og klifur.
2002 Fararstjóri í leiðangri yfir Grænlandsjökul.
2003 Keppti í Arctic Team Challenge, fjögurra daga þrekraun á austur Grænlandi og lenti í 4. sæti.
2004 Denali/Mount McKinley í Alaska.
2005 Elbrus í Kákasus-fjöllum.
2006 Fararstjóri í tveimur leiðöngrum á Grænlandsjökli. Annar fór á 20 dögum þvert yfir jökulinn og hinn var 29 daga leiðangur norður eftir jöklinum og til baka til Ammassalik.
2007 Aconcagua í Argentínu í janúar og Elbrus í júní.
2008
2009
2010
2011 Mt. Vinson á Suðurskautinu
2012 Suðurskautið (111 km – síðasta gráðan) og nokkrir ófarnir tindar.
2013 Norðurhlið Everest (8.848 m)

 

Nokkur hæstu fjöll:

Everest (8.848 m)
Cho Oyu (8.202 m)
Pik Lenin (7.134 m)
Aconcagua
Mt. McKinley
Mt. Vinson
Elbrus
Mt. Blanc

Dagskráin framundan:

Norðurpóllinn (111 km – síðasta gráðan)
Carstensz Pyramid
Kilimanjaro